– Vi er utruleg glade og takksame for at Noregs største dugnad skal handla om kampen mot barneekteskap. Dette er ein av vår tids viktigaste jentesaker og eit av dei verste overgrepa mot jenter globalt, seier Kari Helene Partapuoli, generalsekretær i Plan International Noreg.
Under aksjonsnamnet “Barn, ikkje brud” ønsker Plan å nå ut til tre millionar menneske for å få slutt på barneekteskap i dei landa der problemet er størst: Bangladesh, Nepal, Mali, Niger og Malawi.
– Med inntektene frå årets TV-aksjon skal vi styrka, verna og utdanna jenter for å unngå at dei blir gift som barn. Dette er spesielt viktig i ei tid der koronakrisa har svekt rettane til jenter ytterlegare. Vi skal støtta jenter som har gifta seg og vorte mødrer i ung alder, og dessutan skapa nye moglegheiter for jenter som har komme seg ut av ekteskap og står på berr bakke, seier Partapuoli.
Her kan du lesa meir om korleis pengane frå TV-aksjonen skal brukast.
Kvifor årets tema er så viktig
Hvert tredje sekund blir ei jente gifta bort ein stad i verda. Dette utgjer 12 millionar jenter i løpet av eitt år. Som ein ringverknad av koronakrisa, kan ytterlegare 10 millionar jenter bli gifta bort innan 2030. Kampen mot barneekteskap er derfor viktigare enn nokon gong.
Barneekteskap bremsar utvikling, held oppe fattigdom og hindrar demokrati. Jentene som blir gifta bort mistar ofte moglegheita til å gå på skule, og sjansen for at dei blir utsette for vald og overgrep aukar.
Saman skal vi gi jenter moglegheita til å velja si eiga framtid – og via seg til livet.
Les meir om årsaker, konsekvensar og kva Plan gjer for å kjempa mot barneekteskap.
Vil du vera med på den største dugnaden i verda?
På blimed.no kan du lesa meir om årets aksjon og om korleis du kan engasjera deg.